2026 оны 7 дугаар сарын 22-ны өдөр Монгол, Солонгосын залуусын соёл, боловсролын солилцооны хөтөлбөр амжилттай зохион байгуулагдлаа

2026 оны 7 дугаар сарын 22-ны өдөр "Нарийн гарц" олон хэл, хэл шинжлэлийн хүрээлэн болон Бүгд Найрамдах Солонгос Улсын хамтын ажиллагааны хүрээнд Монгол, Солонгосын залуусын харилцан ойлголцол, соёлын солилцоог бэхжүүлэх зорилготой тусгай хөтөлбөр амжилттай зохион байгуулагдлаа.

Энэхүү арга хэмжээнд Монгол Улсаас 20 сурагч, оюутан, залуус, БНСУ-аас 25 их сургуулийн оюутан оролцож, хоёр орны залуус хамтдаа суралцан, туршлага солилцож, нөхөрлөлийн гүүрийг бий болгосон үр өгөөжтэй өдөр болж өнгөрөв.

Хөтөлбөрийн хүрээнд Солонгосын оюутнууд Солонгосын их сургуулийн сургалтын орчин, оюутны амьдрал, соёл, клубын үйл ажиллагааны талаар танилцуулга хийж, Монголын оролцогчидтой нээлттэй ярилцлаа. Мөн багийн ажиллагаа, хөгжөөнт тоглоом, танилцах болон хамтын ажиллагааг дэмжсэн олон төрлийн үйл ажиллагаа зохион байгуулснаар оролцогчид бие биенээсээ суралцаж, шинэ найз нөхөдтэй болж, үнэ цэнтэй дурсамжийг хамтдаа бүтээсэн юм.

Тус арга хэмжээ нь Монгол, Солонгосын залуусын харилцан ойлголцол, нөхөрлөлийг бэхжүүлэхийн зэрэгцээ олон улсын боловсрол, соёлын хамтын ажиллагааг өргөжүүлэхэд чухал ач холбогдолтой үйл ажиллагаа болсон бөгөөд оролцогчдын зүгээс өндөр сэтгэгдэлтэйгээр хүлээн авлаа.

"Нарийн гарц" олон хэл, хэл шинжлэлийн хүрээлэн нь цаашид ч гадаадын их сургууль, байгууллагуудтай хамтын ажиллагаагаа өргөжүүлж, Монголын хүүхэд, залуусыг дэлхийн боловсрол, хэл, соёлын орчинтой холбосон чанартай хөтөлбөр, олон улсын солилцооны үйл ажиллагааг тогтмол зохион байгуулахын төлөө ажиллах болно.